TWSC Launches Its 2016 Public Forum Series

Anim na Tanong sa Anim na Taon:

Ang mga Agham Panlipunan at Pilosopiya at 
Ang Papalitang Rehimeng Aquino

Ang 2016 UP Third World Studies Center Public Forum Series

Enero - Abril 2016

Malugod na inaanunsyo ng Third World Studies Center ang UP TWSC Public Forum Series para sa taong 2016. Pinamagatang, "Anim na Tanong sa Anim na Taon: Ang mga Agham Panlipunan at Pilosopiya at ang Papalitang Rehimeng Aquino," gaganapin ang serye ng mga public forums na ito mula Enero hanggang Abril 2016, sa pagtatapos ng administrasyong Aquino at bago ang paghahalal ng bagong gobyerno.

Rasyunal

May sapat bang nasasabi ang mga disiplina ng agham panlipunan at pilosopiya sa usapin ng pagpapalit ng administrasyon, sa pagtataya ng nagawa nito, at sa paghahanda para sa susunod? O naging mga “analyst”/“expert” na tagatingi na lamang ng sound bites ang mga akademiko sa mga TV news magazine shows? Nagiging palamuti na nga lang ba ang mga akademiko para sa mga balita na nangangailangan ng tagapagsalitang may autoridad para pagtibayin lamang ang mga litaw naman nang mga obserbasyon? Taga-tuon na lamang ba sila ng pansin ng publiko sa mga isyung ang pagiging napapanahon ay dikta ng news cycle at ng mga nilutong iskandalo? Hindi iilan sa mga kilalang akademiko ang may sariling pulpito sa midya, pero kadalasan reaktibo ang pagsusulat nila at ang pagsusuri ay minadali para makahabol sa init ng balita. May ilan pa ngang tahasang propagandista ng mga interes na pasimple o garapalan nilang pinagsisilbihan. 

Sinasabi ng UP Charter na bahagi ng serbisyo publiko ng unibersidad ang pagbibigay nito ng dalubhasa at teknikal na gabay sa pamahalaan, sa pribadong sektor, at sa lipunang sibil nang hindi ikinokompromiso ang panuntunan nito ng husay. Natutugunan ba ito ng mga akademikong taga-agham panlipunan at pilosopiya sa labas ng kundisyong itinakda ng midya? Ano ang masasabi ng mga disiplina sa yugtong ito ng pagpapalit ng mga nasa kapangyarihan? Nakabatay ang paniningil na ito sa pagpapalagay na nasa interes ng mga akademiko, lalo na ng mga nasa nasabing disiplina, na suriin ang kontemporaryong kalagayan ng lipunan. Pero tila napag-iiwanan na ang mga disiplinang ito at hindi makaambag sa paglikha ng bago at kritikal na diskurso tungkol sa mga napapanahong isyung panlipunan. Hiwalay na usapin rin kung naipapaunawa nga ba ang mga kritikal na pananaw na ito sa publikong dapat sana dito makikinabang.

Inilulunsad ng Third World Studies Center (TWSC) ang serye ng mga public forum na ito upang direktang tugunan ng mga disiplina at ng kanilang mga hinirang na akademiko ang kambal na hamon ng limitado, pili, at pilit na pampublikong pakikisangkot at ng inaasahang husay na dapat na dinadala nila sa mga isyung pampubliko na ginagarantiya ng UP Charter. Sa punto de bista ng bawat disiplina, paano ba dapat unawain ang pagtatapos ng isang rehimen at ang paglipat ng kapangyarihan tungo sa isa pa? Ano bang dapat mga parametro para sukatin ang nagawa, at hindi—pero dapat—ginawa ng bawat administrasyon? Sa forum series na ito ay bibigyan ng espasyo para talakayin sa publiko ng bawat disiplina—higit pa sa sound bites at timeliness ng isyu—nang may lalim at lawak ang mga isyu na sa kanilang palagay ay dapat napagtuunan ng patapos ng rehimeng Aquino at/o mapagtuunan ng hahaliling gobyerno sa 2016, ayon sa mga partikular na interes ng kani-kanilang disiplina. May partikular na urgency ang diskusyong ito, lalo pa’t nakataya dito ang pagpapatuloy ng mga tinaguriang repormistang polisiya ng kasalukuyang administrasyon. 

Pagpapatuloy ang public forum series na ito sa pagsasaligsig ng TWSC sa rehimeng Aquino. Noong 2011 ay nagkaroon ng forum series na sumubok pangunahan kung papaano patatakbuhin ni Aquino ang kanyang administrasyon. Pinamagatang “The B.S. Aquino Administration: Possible Perversities, Perverted Possibilities,” lumutang sa apat na forum sa serye na ito ang kalauna’y naging pangunahing pagkukulang ng administrasyon--ang hindi pagtupad sa mga matatapang na pangako ng reporma na siyang mismong nagpapanalo kay Aquino sa pagkapangulo. Napako nga ang mga pangako dahil sa pagpapabor ni Aquino sa mga “kaibigan, kaklase at kabarilan” bilang mga tao sa kanyang gobyerno at sa mismong pagpo-protekta sa kanila mula sa pag-uusig sa tuwing masasangkot sa mga anomalya (hal. sina dating DILG Undersecretary Rico Puno at dating PNP Director General Alan Purisima). 

Kaakibat rin na layon ng public forum series na ito na kasangkutin ang mga batang henerasyon sa paglikha ng bago at kritikal na diskurso sa mga isyung bumagabag sa kasalukuyang administrasyon at patuloy pa ring babagabag sa mga susunod. Ang talakayang ito ay inaasahang kokontra sa nakababahalang pag-arangkada ng mga grupo sa social media na nagsasabing Ginintuang Panahon ang mga taong nasa ilalim ang Pilipinas ng diktadurang Marcos—na kinabibilangan sa karamihan ng mga kabataang pumupuna sa mga pagkukulang ng administrasyong Aquino bilang munisyon sa pagbalewala sa mga alaala ng pang-aabuso ng diktadura at sa argumentong wala namang naidulot na kongkretong benepisyo sa bansa ang EDSA 1 at lalo pa ngang naghirap ang Pilipinas. 

Ang mga Public Forum

Magkakaroon ng apat (4) na public forum sa serye, kung saan isang forum ang gaganapin sa bawat buwan mula Enero hanggang Abril 2016. Ang bawat departamento ng Kolehiyo ng Agham Panlipunan at Pilosopiya ng UP Diliman ay iimbitahang magpadala ng isang kinatawan na maghahain ng anim na tanong, na maglalatag ng mga isyung panlipunan na sa palagay ng bawat disiplina ay karapat-dapat na pag-ukulan ng pansin—bagay na hindi naibigay, o kung ibinigay man ay hindi sapat, ng gobyernong Aquino—ng pamahalaan. Gugrupuhin ang mga kinatawang ito batay sa ipiprisintang mga tanong para maging tampok na tagapagsalita—dalawa (2) sa bawat isa—sa mga public forum ng serye. Magi-imbita rin ng tig-isang (1) reactor mula sa mga kaugnay na disiplina para magbigay ng iba at/o komplementaryong perspektiba sa mga isyung ihahain ng mga tagapagsalita. Pangunahing magiging audience ng mga forum ang mga mag-aaral na undergraduate ng UP Diliman at iba pang mga unibersidad at kolehiyo.


Ang Forum Series na ito ay suportado ng UP Padayon Public Service Office ng UP Office of the Vice President for Public Affairs. Ang presentasyon ng mga speaker sa apat na public forum ay itatampok sa UP sa Halalan website, na proyekto ng UP Padayon na naglalayong mapakinabangan ang kasanayan ng mga akademiko sa UP upang mapaabot sa publiko ang mga matalim at mas malalimang pagtalakay ng mga mahahalagang pambansang isyu na siya namang magiging impluwensiya sa mga desisyon ng mga botante sa Halalan 2016.